القانون المصرى = هاءوءوو

"نبتدى منين الحكاية؟" زي ما بيقول العندليب, حابتدى من اللقاء اللى عملته مقدمة برنامج ال10 مساءاً مع مالكhttp://malek-x.net/ وعلاء http://manalaa.net/ عن الBloggers فى مصر.فى الحقيقة اللقاء كان ماشى كويس و الواحد فرحان ان لسه فيه فى مصر شباب بيحبوا البلد دى من قلبهم وعندهم الجرأة انهم يعارضوا بدون خوف لغاية ما جيه التليفون بتاع مساعد وزير الداخلية,ولا معرفش ايه فى الداخلية,اللى شلنىّ و حرق دمى لما قال أن الEgyptian Bloggers مابيحترموش القانون.قانون ايه اللىّ نحترموا؟ القانون اللى بيظلم البرئ ويبرئ الظالم, القانون اللى اصحاب البدل الفاخرة بيستخدموه عشان ينهبوا خير البلد, قانون حسنى مبارك وشركاه ولا قانون الداخلية فى الإعتقال والترهيب والتلفيق وبعد كل ده السيد المسئول بيطالب الEgyptian Bloggers بإحترام القانون....بصراحة اخص على الBloggers اخص,لأ بجد اخص. ودلوقتى بقه احكيلكم على اللى حصل امبارح.امبارح كانت أول مرة انزل وسط البلد بعد أحداث التحرش الجنسي اللى حصلت فى العيد,كنت منتظرة اشوف حاجه مختلفة,معرفش بالضبط ايه هى الحاجة ديه(يمكن كنت مستنيه اشوف عربيات أمن زيادة أو اشوف حاجة مختلفه فى الناس....معرفش حقيقى كنت مستنيه ايه؟ ماأنا عارفه انها بايظه بايظه, لا عمر الأمن حيعمل حاجه (إذ كانت الداخلية مش معترفه اصلا ً بالحادثة) ولا عمر الناس بتتغير وتصحى).وبالرغم من كل ده كنت منتظره شئ ما.المهم خرجت الموضوع من دماغى وقررت اعدى الشارع ولكن وأنا لسه بقول ياهادى لقيت عسكرى من بتوع أمن الدولة بيشاور لعربيه من العربيات النص نقل اللى بيبقى مكتوب عليها شرطة عشان ترجع بدهرها للوراء,تقريبا كان بيساعده يركن.كل ده مفهوش حاجه,لكن المستفز فى الموضوع ان العسكرى اللى سايق كان راجع بدهره يعنى مفروض تكون سرعته قليلة ويكون باصص وراه لكن فى الحقيقة ده كان منطلق زى الصاروخ لدرجة انه كان حيدهسنى لولا انى تمالكت نفسى ورجعت للوراء سريعا ًولما بصيت للعسكري بغل لقيته فاتح بقه زى الجاموسة وعمّال يضحك.ياترى بقه لو كانت عربيه الشرطة ديه دستنى فعلاً ومت, كان أهلى حيعرفوا يأخذوا حقى من الجاني؟ ياترى كان القانون حاينصفهم؟ ولو حتى نصفهم,ياترى كان الحكم حيتنفذ؟؟......والله أنا ماعارفه ايه البلد ده اللى الواحد لايعرف يأخذ حقه فيها لا حى ولاميت..ولسه الداخلية بتطالبنا بإحترام القانون بس عشان بنقول رأينا بحرية............هاءوءوووووووووو